Madaxweynaha Kenya William Ruto ayaa maanta saxiixay sharci canshuurta ku kordhinaya badeecado kala duwan ee dalkaas.
Madaxweyne Ruto ayaa iska dhego tiray dhalleeceyn ku saabsan in uu xaaladda ku sii adkeynayo shacabka Kenya ee wajahaya dhibaatooyinka dhaqaale.
Sharcigan cusub ee canshuuraha ayaa waxaa toddobaadkii tegay saxiixay baarlamanka, wuxuuna laba laabayaa canshuurta shidaalka, oo uu ka dhigayaa 16 boqolkiiba.
“Madaxweyne Ruto wuxuu ansixiyey sharciga maaliyadda. Wuxuu ku saxiixay madaxtooyada,” ayaa lagu yiri qoraal ay soo saartay dowladda Kenya.
Ruto oo xafiiska la wareegay bishii September kadib doorasho si xooggan loogu loolamay ayaa isku dayaya inuu buuxiyo qasnadaha dowladda ee maran, islamarkaana dib u hagaajiyo dhaqaalaha waddanka.
Dowladda Kenya ayaa daymo badan lagu leeyahay, kuwaas oo uu madaxeeynaha cusub ka dhaxlay madaxweynihii ka horreeyey Uhuru Kenyatta.
Kenya ayaa waxaa hadda lagu leeyahay dayn gaaraysa $70 bilyan, taasi oo u dhiganta 67 boqolkiiba wax soo saarka guud ee dalka (GDP).
Sharciga cusub — oo la filayo inuu soo kordhiyo in ka badan $2.1 bilyan oo dakhli cusub ah — ayaa canshuurta ku kordhin doona badeecado iyo adeegyo ay ka mid yihiin cuntada iyo adeegga lacagta la isugu diro mobile-ka.
Dadka bishii uu soo galo dakhli dhan 500,000 shilling ($3,600) ayaa bixin doona 32.5 boqolkiiba oo ah canshuurta dakhliga.
Sidoo kale kuwa sameeya 800,000 shilling ($5,700) ay bixin doonaan 35 boqolkiiba, halka markii hore ay bixin jireen 30 boqolkiiba.
Waxaa sidoo kale la saddex jibaaray canshuurta ganacsiyada yaryar oo laga dhigay saddex boqolkiiba.
Canshuur cusub oo ah shan boqolkiiba ayaa la saaray dadka dakhliga ka sameeya muuqaallada baraha bulshada sida Fb iyo YouTube.
Mucaaradka Kenya ee uu hoggaamiyo Raila Odinga ayaa ku hanjabay dibad-baxyo cusub oo ka dhan ah canshuurta cusub.
PUNTLAND POST
