BOOSAASO (SMN) – Warbixin cusub oo todobaadkan ay soo saartay kooxda dabagalka cunaqabataynta Qaramada Midoobay ee Soomaaliya ayaa ka digtay in dagaalyahanno ajnabiah oo ay ku jiraan kuwa kasoo jeeda qaarkooda dalalka Bariga Dhexe, ay ku biireen Daacish-ta Soomaaliya.
Tirada dagaalyahannada shisheeye ee ku biiraya Daacish-ta Soomaaliya ayaa sii kordhayay mudooyinkii dambe, iyadoo Qaramada Midoobay ku tilmaantay qulqulka ajaaniibta ee soo gaaraya dalka ay khatar wayn ku tahay amnigiisa. Tirada Daacishta ku sugan Soomaaliya ayaa lagu qiyaasay 600 illaa 700 oo dagaalyahan.
Warbixinta waxay soo bandhigtay in Dagaalyahanada ajnabiga ay kasoo galaan dalka dhanka Puntland iyagoo isticmaalaya marinnada badda iyo dhulka, waxayna tagaan dhulka buuralayda gobolka, oo saldhig ay ku leedahay Daacish.
Dagaalyahannada ajnabiga ah ayaa la sheegay in ay kor u qaadeen awoodda kooxda Daacish-ta Soomaaliya. Ilo-wareedyo sirdoon ayaa ku tilmaamaya dhaq-dhaqaaga Daacish ee buuraleyda Cal-Miskaad ee Puntland, inuu ku yimid isbeddel xooggan.
Warbixinta Qaramada Midoobay ayaa lagu sheegay in inta badan dagaalyahanada ajnabiga ay ka yimaadaan Syria, Yemen, Ethiopia, Sudan, Morocco iyo Tanzania. Waxaa ku jira tababarayaal ka yimid qaybo ka mid ah Bariga Dhexe.
Dowladda Mareykanka ayaa sheegtay bishii hore in awoodda Daacishta Soomaaliya ay korortay laba jibaar sannadkii la soo dhaafay.
Warbixintu waxay xaqiijisay in hoggaamiyihaha Daacishta Soomaaliya Cabdulqaadir Muumin, oo ka badbaaday duqeyn diyaaradaha Mareykanka la eegteen bishii June ee sanadkan, bathroom dalacsiiyay madaxa agaasinka guud ee kooxda Daacish, “isagoo kaalin hoggaamineed ka galay xiriirka kooxaha Daacish ee Afrika.
Garabka Daacish ee Soomaaliya ayaa waxaa C/qaadir Muumin uu ku aas-aasay buuraha gobolka Bari sanadkii 2015, waxaana kooxdiisa ay dhaqaalaha ahaan ku tiirsan tahay canshuurta ay ka qaado ganacsiga magaaladda Boosaaso, sida ay sheegeen saraakiil amni.
