Ugu yaraan labo ruux oo carruur ahaa ayaa ku dhintay dagaal culus oo dhexmaray ciidamada sida gaarka ah u tabbaran ee Danab iyo xubin sare ka tirsan Al Shabaab, sida ay dadka degaanka u sheegeen Idaacadda Shabelle.
Dagaalkan oo ka qarxay Degaanka Buladul-Amiin ee Gobolka Sh.Hoose ayaa yimid kadib markii Ciidanka Danab ay u doonteen hooy uu degan yahay shaqsi lagu magacaabo Maxamed Abuukar, kaasi oo sida la sheegay ka tirsan Ururka Al Shabaab.
Goobjooge la hadlay Idaacadda Shabelle ayaa sheegay in Maxamed Abuukar uu rasaas ku furay Ciidanka, islamarkaana uu goobtay baxsaday balse uu dhaawac soo gaaray gabar uu isagu dhalay halka laba carruur uu awoowe u ahaana ay dhinteen.
Ciidanka howlgalka fuliyay ayaa sida la sheegay ka soo daatay diyaarad nuuqa qumaatiga u kacda oo ka soo duushay Degaanka Balidoogle ee Gobolka Sh.Hoose oo qiyaas ahaan 90 km dhanka waqooyi galbeed uga beegan Magaalada Muqdisho.
Ilaa hadda lama ogga khasaaraha dhabta ee Ciidanka Danab ka soo gaaray iska-horimaadkii xalay iyo xogta shaqsiga la doonayay in lagu bartilmaameedsado howlgalkan ka dhacay Degaanka Baladul-Amiin ee Gobolka Sh.Hoose.
Si-kastaba, Ciidanka Danab oo si gaar ah uu u tabbabaro Mareykanka ayaa inta badan fuliya howlgallada lagu beegsado saraakiisha ugu sareysa Kooxda Al Shabaab maadaama Kooxdan ay dagaal adag kula jirto Dowladda Federaalka Soomaaliya.
