MUQDISHO – Masar, Qatar iyo Imaaraadka Carabta ayaa si kulul u cambaareeyay weerar ismiidaamin ah oo Axaddii ka dhacay meel u dhow saldhigga milatari ee Damaanyo, magaalada Muqdisho, kaasoo sababay khasaare naf iyo maalba leh.
Wasaaradda Arrimaha Dibadda ee Masar ayaa war-saxaafadeed ku sheegtay in ay “si xooggan u cambaareyneyso” weerarka, iyadoo muujisay taageero buuxda oo ay la garab taagan tahay dowladda iyo shacabka Soomaaliyeed.
Masar waxay sidoo kale tacsi u dirtay qoysaska dhibbanayaasha iyo shacabka Soomaaliyeed, iyadoo u rajeysay dhaawacyada in ay si dhaqso ah u bogsadaan.
Qatar ayaa iyaduna si rasmi ah u cambaareysay weerarkaasi, iyadoo xustay in Dooxa ay weli ka go’an tahay ka hortagga dhammaan noocyada argagixisada iyo rabshadaha.
Sidoo kale, Imaaraadka Carabta ayaa bayaan la mid ah ku muujiyay taageero iyo tacsi u diraya dowladda iyo shacabka Soomaaliyeed, gaar ahaan qoysaska ay waxyeelladu soo gaartay.
Sida ay sheegeen ilo-wareedyo maxalli ah, qofka weerarka fuliyay ayaa isku qarxiyay xilli uu ka dhex jiray dad dhalinyaro ah oo saf ugu jiray isdiiwaangelinta ciidamada xoogga dalka.
Ilaa hadda cid sheegatay masuuliyadda weerarka ma jirto, hase yeeshee ciidanka ammaanka ayaa kordhiyay feejignaantooda, iyadoo baaritaanno socdaan.
