Muqdisho – Qaar ka mid ah shacabka ku nool caasimadda Soomaaliya, gaar ahaan xoogsatada, dhalinyarada wadayaasha mooto bajaajta iyo fekoonta, ayaa si weyn uga cabanaya diiwaangelin codbixineed oo ay ku tilmaameen mid lagu qasbayo, taas oo si joogto ah ay ula kulmaan maalin kasta.
Dadkaasi ayaa sheegay in ciidamada ammaanka ee degmooyinka magaalada ay si khasab ah uga soo qabqabanayaan waddooyinka iyo goobaha ay ka shaqeystaan, islamarkaana lagu khasbayo in lagu geeyo xarumaha diiwaangelinta codbixiyeyaasha.
Arrintan ayaa keentay in ay waayaan fursado shaqo oo ay ku maarayn lahaayeen noloshooda maalinlaha ah, maadaama waqti badan lagu haynayo xarumahaasi.
“Waxaan usoo baxay inaan qaraar ka raadsado, balse halkii shaqo laga heli lahaa, waxaa nalagu qasbay in naloo kaxeeyo xarun diiwaangelin, waqti badanna halkaas ayaan ku luminay,” ayuu yiri mid ka mid ah wadayaasha fekoonta.
Cabashadan ayaa imaanaysa iyadoo Guddiga Doorashooyinka Madaxa Banaan uu kordhiyay muddada diiwaangelinta codbixiyeyaasha, taas oo la gaarsiiyay 15-ka July 2025, si dad badan ay u helaan fursad ay iskaga diiwaangeliyaan.
Xoogsatada iyo dhalinyarada cabanaya ayaa ugu baaqay dowlad-goboleedka iyo guddiga doorashooyinka in la joojiyo qasabka lagu diiwaangelinayo dadka shaqeeya, isla markaana bathroom oggolaado in si xor ah oo aan culeys lahayn ay u gutaan waajibaadkooda doorasho.
