Qaar kamid ah mas’uuliyiinta Gobolka Nugaal ku matala dowladda Puntland oo maalmo ka hor Shir ku yeeshay bannaanka Garoowe ayaa weli ku guulaysan la’ dadaal ku saabsan abaabulka odayaal iyo cuqaal warbaahinta uga jawaaba siyaasi Xasan Shire Abgaal.
Xasan Shire Abgaal oo dhawaan lagu soo dhaweeyay Garoowe ayaa si adag u dhaliilay Madaxweyne Deni iyo Xukuumaddiisa, kaddib markii uu sheegay in dhammaan hay’adihii dowliga ahaa ee Puntland ay hawlgab noqdeen, oo aysan jirin hal mid oo shaqa ka socoto, islamarkaana shaqaalihii iyo ciidamadii Puntland xuquuq la’aan yihiin in ka badan lix bilood, taasi oo keentay in ciidamadu waddooyinka xirtaan oo xannibaan gaadiidkii canshuur-bixiyaasha ahaa.
“Waxaad ogtihiin maamulkii dowliga ahaa iyo hay’adihii dowladdu meeshay marayaan iyo siday yihiin maanta hal xafiis dowladeed oo shaqeeya ma jiro Puntland, guud ahaana shaqa socota ma jirto, waxaad ogtihiin mushaarooyinkii shaqaalaha iyo ciidamada waxaa ugu danbaysay mudda lix bilood ka badan, oo ciidamadii waddooyinkay isbaarooyin dhigteen, si ay xuquuqdooda u helaan” ayuu yiri Xasan Abgaal.
Intaasi kaddib, mas’uuliyiinta Gobolka Nugaal kumatala Pl oo culays dareemay ayaa isku dayay in ay abaabulaan odayaal warbaahinta uga jawaaba siyaasi Xasan Shire, taasi oo ay weli ku guulaysan la’ yihiin, halka dhinaca kale Xasan Shire uu Kulamo hoose ka wado Garoowe tan iyo markii uu dib ugu soo noqday magaalada.
PUNTLAND POST
