Wararka ka imanaya buuraha Calmiskaad ayaa sheegaya in kooxda Daacish ay xalay jidka u gashay gaari Ambalaas oo ka soo noqday qaadista askartii ku dhaawacantay weerarkii habeen hore ee Dhaadaar.
Weerarku wuxuu ka dhacay deegaanka Daraymadoobe ee togga Jaceel oo u dhexeeya Dhaadaar iyo Tuurmasaale, waxaana wararku sheegayaan in la helay askari meyd ah, islamarkaana la la’ yahay dhakhtarkii la socday gaariga, halka askartii kale ka badbaaday weerarka.
Ciidamada Puntland ayaa weli ka hadlin weerarkii xalay iyo kii habeen hore, kuwaas oo sababay khasaare isugu jira dhimasho, dhaawac iyo dhakhtar la la’ yahay.
Deegaannadaas waxaa ka go’aan isgaarsiin teleefoonka oo ay dhawaan jartay kooxda Daacish, waxaana aad u yar wararka madax bannaan ee laga heli karo deegaannadaas.
Muddooyinkii u dambeeyay waxaa soo badanayay weeraro ay gaysteen kooxda Daacish ee ku dhuumaalaysata buuraha Calmiskaad ee gobolka Bari.
PUNTLAND POST
